نعمة النسيان ..
النسيان نعمة من الخالق ومثل ماهي نعمه بعد هي نقمه .... كيف ؟
يقولك الشي اللي يزيد عن حده ينقلب ضده .. فإذا كان الانسان كثير النسيان بتكون نقمه
ومش نقمه بصريح العبارة ..... هذا يسمونه مرض ويحتاج علاجه
النسيان ياجماعه الخير نعمه من الله ونعمه كبره ونحن مش حاسين فيها ولازم نحمد ربنا عليها
لن الشخص منا لو مانسى ممكن يموت ..
هيه نعم يموت ليش مستغربين !
مخ الإنسان يستوعب أشياء كثيره ويفكر فيها لكن إذا فكر فكل شي مره وحده هني بيحس تضارب في أعصاب المخ
وبالتالي يؤدي الى توقف المخ وتحدث الوفاه لذلك النسيان نعمه من رب العالمين .
في ناس نسيانهم كثير ودايم ينسون .. مثل واحد من الشباب الله يذكره بالخير
كل ما أسأله عن شي يقول ماعرف أو نسيت وايلس اذكره لين ماروحي انسى الموضوع ..
مستوي مثل ام سلوم ههههههه
قبل فتره سويت دراسه وبحث بسيط عن موضوع النسيان
فقمت أسأل أشخاص معينين ممن كانت لهم علاقه وحصل الفراق مع أشخاص يعزونهم وايد
حتى انا سألت نفسي هالسؤال
وكنت أسأل سؤال معين وألح فيه .. وهو شو تسوي إذا بغيت تنسى شخص عزيز عليك فارقته ؟
ومن باب الدعابه سألتهم .. شو سويتوا أو كيف رمتوا تنسوني .
تفاوتت الإجابات لكن مالقيت لكن مالقيت فيها الجواب الشافي !!
من الإجابات :-
طبعاً تختلف الإجابات والطرق من شخص لآخر :- منها
1- اللي قال أقعد مع ربعي وأسولف وأشغل وقتي
2- اللي قال أدخل النت وادخل منتديات وجات واسولف وأتعرف
3- اللي قال كل ما أتذكر أحاول إني أفكر بشي ثاني
4- اقضي وقتي فالنوم أحسن بدال ما أفكر وأعور قلبي
5- مارمت انسى وبعدني مع الذكرى
6- ..............
7- ........
8- .....
الإجابات وايد بس ولا إجابه شافيه
وعن نفسي :-
إذا كنت أفكر فموضوع معين وأشوف هالموضوع شاغل كل وقتي وتفكيري
1- أحاول أشغل نفسي بأشياء ثانيه
2- اطلع واحوط أو ايلس ويا ربعي وأسولف عشان انسى
إذا شفت ماشي فايده وإن هذا الشي اللي أفكر فيه مأثر فحياتي اليوميه ومش رايم انساه !
- احاول اني اغير جو وابتعد شوي ...
كنت اشل حد من ربعي واروح أبوظبي واقعدلي يومين او ثلاث فنادي ضباط القوات المسلحه
منها أغير جو ومنها أعيد ترتيب حياتي وأفكاري لن الجو هناك عجيب الصراحه ومكان حلو
حتى اني اسميه راحه واستجمام
يوم يسألوني وين رايح أقول { راحه وإستجمام } حد بيخاويني
وإذا شفت إن هالتفكير بعده موجود وماشي فايده وذابحني ومتعبني وايد ومغير حياتي :-
أسافر .... أسافر لو 10 أيام أغير جو وأرجع .
على قوله الشاعر ::
مع ريح الهوا مسافر ... ادور ديرة النسيان
مالي بالهوى خاطر ... ولاني ذاكر العنوان
وعلى كل اللي سويته مارمت انسى الموضوع اللي دوم افكر فيه .. كملت سنتين وهب رايم انسى
لكن فالنهاية وبعد الطرق والإجابات لموضوع النسيان تبقى هذي حلول
ومرات تصيب ومرات تخيب
وكله يرجع على حسب الشي المراد نسيانه ..
ياهي مشكله أو حدث معين أو شخص عزيز تفارقت وياه ومش قادر على نيسانه
أخي القارئ / أختي القارئه
تخيلوا معاي شوي ...
- عندكم شخص عزيز على قلوبكم وهذا الشخص تعتبرونه كل شي بحياتكم ودايم مع بعض
فالحلوه والمره .. فالضحك والحزن .. يشارككم افراحكم واتراحكم
وتميتوا فترة من الزمن .. سنه .. سنتين .. ثلاث أو أكثر
ومره وحده هذا الشخص يختفي من حياتكم ويرحل وتعرفون إن الرجوع صعب وشبه محال ...
شو بتسوون ؟؟
أكيد الواحد منا بيعيش حياته حزين معذّب فاقد الغالين وماله خلق لأي شي حتى الأكل بيعافه لو كان يوعان
بتتغير حياته وتفكيره وبيتم همه الوحيد هذا الشخص .. وألف سؤال يدور فباله .
- إذا حد منا مر بهاي التجربة أو هذي الحادثه من قبل وشاف العنا وسوا اللي سواه
وبعد فتره من الزمن قصيرة كانت أو طويلة وشاف إن هذا الشي نساه بروحه ومايعرف كيف نساه ... !!
طبعاً مستحيل ينساه نهائياً
لكن سبحان الله شاف إن هذا الشي طلع من باله وماعاد يهتم فيه مثل أول
وأصبح ذكرى في دفتر الحياه ....
كيف صار هذا الشي ؟؟ كيف نساه ؟؟ كيف .. كيف .. كيف ؟
هذي هي نعمه النسيان
الله يلهم عبده الصبر والسلوان ويرحمه بالنسيان لكي يكمل حياته ولا يتوقف عند نقطه معينه
وليذكر نعمة الله عليه
فالحمبه من الله والنسيان نعمة من الله
والإنسان سمي إنسان من الإنس والإستئناس والنسيان ..
لأنه مستحيل يعيش حياته لوحده ومستحيل يتذكر كل التفاصيل اللي مرت فحياته
ومافي إنسان ماينسى .. نحن بشر ومافي حد كامل غير رب العالمين الذي لا ينسى
(( جل من لايسهو ))
فالنسيان نعمه وليس نقمه
ولازم نحمد الله على نعمه الكثيره علينا
" اللهم عافنا واعفوا عنا واصلح بالنا واجعلنا من عبادك الصالحين " آمين
الرئيسية 
البوابة 
أحدث الصور 
التسجيل 
دخول 
10.03.09 6:54 من طرف 
